Tež bywša šula w Dobrošicach, hdźež pak wučachu dźěći jeničce 14 lět, je k šulskim stawiznam w našej kónčinje přinošowała. Zajimawe, zo njebu jako kubłanišćo twarjena, ale jako knježi hród. Ze zawjedźenjom šulskeje winowatosće 1835 w Sakskej mějachu dźěći z Koslowa, Hórkow a Dobrošic do Chrósćic abo do Róžanta, tehdy wězo pěši, jara daloki šulski puć. Starši z tychle wsow so 1897 z wjacorymi listami wyšnosći wo twar šule prócowachu. Dokelž pak njeběchu sej wo twarskim městnje přezjedni, dokelž njebě nabožina jako předmjet zaručena a dokelž njeběchu pjenjezy za twarske wudawki, šula w Dobrošicach njenasta. W 1930tych lětach starši znowa doraznje swoje žadanje zastupowachu, štož so wospjet njeporadźi.

Wotrowska pěstowarnja načinja gmejnje Pančicy-Kukow tuchwilu najwjetše starosće. Chcedźa-li kubłanišćo po dwěmaj njewjedromaj porjadnje ponowić, trjebaja pjenjezy, kotrež gmejna nima. Wězo wjesnjanosta wšitko za to čini, spěchowanske srědki wobstarać. Hač pak to sam zmištruje, je dwělomne. Za to trjeba wón podpěru staršich runje tak kaž Serbskeho šulskeho towarstwa jako nošerja. Jeno zhromadnje budu rozrisanje w zmysle serbskich dźěći nadeńć móc. Runje tak dyrbjeli nětko tež serbscy politikarjo na swojej runinje aktiwni być a swój wliw zasadźeć, zo bychu so trěbne pjenjezy přewostajili. Suma, wo kotruž dźe, dźě njeje tak hoberska. Hdyž jenož na to myslu, z kelko miliardami je knježerstwo w zašłosći wulkim bankam pomhało, da je runjewon zrudne, hdyž dyrbiš kaž po prošenju chodźić, chceš-li serbskej pěstowarni pomhać. Marian Wjeńka

Drježdźany (SN/JaW). Sakski krajny zarjad za dróhotwar a wobchad (LASuV) je spěchowanske srědki za wjacore twarske naprawy w Hornjej Łužicy přizwolił. Kaž ze zdźělenki zarjada wuchadźa, chcedźa w Husce hač do klětušeho nowe bjezbarjerne busowe dwórnišćo ze štyrjomi zasta­nišćemi a dalše zastanišćo we wsy natwarić. W Dobruši matej nowej busowej zastanišći nastać. Za to přewostaja statne ministerstwo za hospodarstwo, dźěło a wobchad we wobłuku spěchowanja k polěpšenju wuměnjenjow w regionalnym bliskowobchadźe gmejnje Dobruša-Huska 338 000 eurow spěchowanja, štož wučinja 75 procentow.

W Rachlowje pod Čornobohom wotstronja z pomocu spěchowanja LASuV škody wulkeje wody z lěta 2013. Tam natwarja fachowcy skłoninu při Splóšćanskej wodźe bjezposrědnje při statnej dróze S 110 a wuporjedźa jězdnju na křižowanišću. Wudawki we wobjimje 50 000 eurow zarunatej Zwjazk a Swobodny stat Sakska ze srědkow k sporjedźenju škodow wulkeje wody.

Žane zapławjenja njebyli

Budyšin. Za dźensa připowědźene móžne zapławjenja sylneho dešća dla su w Hornjej Łužicy wuwostali. Byrnjež so cyły dźeń dešćowało, rěki mnóstwa wody přiwzachu a njejsu přeběželi. Pegele, mjez druhim Klóšterskeje wody a Čornicy, drje postupichu hač do popoł­dnja wo něhdźe 30 centimetrow a dalše zdźěla wjace, wostachu pak pod alarmowym schodźenkom.

WWF přilubja myto

Berlin. Po najnowšim morjenju wjelka w Sakskej přilubja wobswětoškitna organizacija WWF 25 000 eurow za rozsudny pokiw na skućićela. Nimo toho žada sej WWF intensiwniše přesćěhanje skućićelow. Minjene tři lěta su w Němskej 18 wjelkow ilegalnje morili. Pola Biehaina w Zhorjelskim wokrjesu nańdźechu minjenu sobotu zatřělenu wjelčicu.

Kritizuja nowy zakoń