24 milionow eurow a nic wjace
Poprawom měješe Slepjanski němsko-serbski šulski centrum hižo loni hotowy być. Dotal pak wot njeho hišće ničo widźeć njeje. Nětko ma so w tym nastupanju skónčnje něšto hibać.
Slepo (AK/SN). W septembru chce Slepjanska gmejna němsko-serbski šulski centrum wotkrywać započeć. „Po móžnosći nalěto 2017 ma so twarić započeć a 2019 chcemy zaćahnyć“, podšmórny nawoda twarskeho wotrjada Slepjanskeho zarjadniskeho zjednoćenstwa Steffen Seidlich na zašłym posedźenju gmejnskeje rady. Jeje čłonojo so po intensiwnej a kontrowersnej diskusiji dojednachu, zo ma twar 24 milionow eurow płaćić a nic wjace. 7,6 milionow eurow ma sakske kultusowe ministerstwo jako spěchowanje přidać, „zbytk“ financuje Vattenfall. Gmejna swójski podźěl płaćić njetrjeba, wona pak je twarski knjez.
Diskusija bjez wuslědka
Wěstota šulerjow w srjedźišću stała
Wěstota pěstowarskich a šulskich dźěći kaž tež techniske wuhotowanje wyšeje šule steještej w srjedźišću wčerawšeho posedźenja Radworskeje gmejnskeje rady. Přišli běchu mjez druhim nawodnica zakładneje šule Brigita Grundmannowa a nawodnica wyšeje šule Hilža Štilerowa, wučerjo wobeju kubłanišćow kaž tež zastupjerjo staršich.
Krótkopowěsće (22.06.16)
Wo přichod Bombardiera šło
Berlin. Přichod Bombardiera z wotnožkomaj w Budyšinje a Zhorjelcu bě dźensa tema wuradźowanja jednaćelstwa a zastupnistwa sobudźěłaćerjow koncerna. Při tym dźěše tež wo planowane wotstronjenje dźěłowych městnow w Němskej. Zastupjerjo dźěłarnistwa IG metal a cyłkowna zawodna rada chcychu próstwu wo inowaciske spěchowanje Sakskeje předstajić. Dalše wobstaće stejnišćow pak měło garantowane być.
Nowe stejnišćo w Kodersdorfje
Drježdźany. Předewzaće Elbe Flugzeugwerke tzwr ze sydłom w Drježdźanach chce druhe produkciske stejnišćo we wuchodosakskim Kodersdorfje wotewrěć. Cyłkownje 40 milionow eurow za to nałoži. Předwidźane je, klětu z produkciju započeć. Hač do kónca přichodneho lěta ma něhdźe sto nowych dźěłowych městnow nastać.
Postawa so nawróći
Serbšćinarjo na ekskursiji byli
Na dwudnjowsku ekskursiju po Łužicy podachu so njedawno serbšćinarjo 9. lětnika Wyšeje šule „Korla Awgust Kocor“ Kulow. Jich prěnja stacija bě wobydlerski centrum Piwarska hasa 1 we Wojerecach. Tule bu 1912 narodna organizacija Domowina załožena. Dale dźěše přez wokrjesnu hranicu do Rownoho, hdźež wopytachu Njepilic statok. Tam zeznajomichu so z twarskim stilom Slepjanskeje kónčiny. Přichodna stacija bě Serbski kulturny centrum w Slepom. Sylwija Panošina překwapi Kulowčanow w Slepjanskej drasće z chlěbom a selu. Serbsce wodźeše jich po domje a rozjasni jim wosebitosće Slepjanskeje kónčiny a rěče. Tu móžachu šulerjo swoje znajomosće serbšćiny nałožować. Z wuhladneje wěže na kromje Běłeje Wody mějachu woni wuhlad na brunicowu jamu z jeje techniku.
Čłonojo sportoweho towarstwa stajnje spušćomni
Njeswačidło (LR/SN). Mjeztym hižo dwanaty raz witachu minjenu sobotu žony w baroknych kostimach wopytowarjow při zachodźe Njeswačanskeho parka na woblubowanu šlagrowu nóc. Na swój wustup wjeselachu so dwě młodej spěwarce a třo spěwarjo, znaći z rozhłosa a telewizije. Organizowało je wječor z mnohimi wopytowarjami sportowe towarstwo Módro-Běli Njeswačidło. Wotežki w rukomaj měješe předsydstwo na čole ze Steffenom Steinom a Jannetu Fliegnerowej. „Při dwanatym tajkim wulkozarjadowanju mamy mjeztym nazhonjenja, kotre dźěła maja prioritu. Projekty tajkeho razu so jeničce šlachća, hdyž móžeš so na sobustawow stoprocentnje spušćeć“, zwurazni čłon předsydstwa Tomaš Čornak za Šešowa. Mjeztym čłonojo jednotliwych sportowych wotrjadow swoje nadawki a zamołwitosće znaja.
Policija (21.06.16)
Awto rubił a znjezbožił
Wjelećin. Na Mnišonskej dróze we Wjelećinje je dźensa we 8.30 hodź. młody muž na jězdnju skočił a awto zadźeržał. Wodźerku Suzukija kaž tež sobujěducu wón z jězdźidła storhny a twochny z nim do směra na Hornju Hórku. Kilometer dale pak wón kontrolu nad wodźidłom zhubi a zwróći. Muž drje hišće pěši ćekny, policija pak jeho pozdźišo dosahny.
Hobbyje wjesnjanow sej zbližili
Hinak hač druhdźe kulturny program abo wohnjowoborne wubědźowanje steješe w srjedźišću Běłochołmčanskeho wjesneho swjedźenja wosebite wuchodźowanje po wsy z 13 stacijemi.
Běły Chołmc (AK/SN). Před dlěšim časom zrodźenu ideju, předstajić na swojim wjesnym swjedźenju hobbyje a talenty wobydlerjow, su minjeny kónc tydźenja w Běłym Chołmcu zwoprawdźili. Tam sy so minjenu sobotu na 13 stacijach wo tym přeswědčić móhł, kak kreatiwnje so wobydlerjo we wólnym času zaběraja. „Tak chcychmy swojich ludźi trochu wužadać, ale tež začuće zhromadnosće skrućeć“, rjekny Andreas Thomas, městopředsyda wjesneho towarstwa, kotrež je swjedźeń organizowało.
Ludźom spěšnišo pomhać
W Sćijecach nastawa nowa wuchowanska straža wokrjesa
Budyšin (CS/SN). Ze symboliskim prěnim zarywom su wčera na kromje Budyšina w Sćijecach nowu wuchowansku stražu twarić započeli. Gratu přimachu so přirjadnik krajneho rady Udo Wićaz, zapósłancaj Sakskeho krajneho sejma Marko Šiman a Patricia Wissel, krajny rada Michael Harig (wšitcy CDU), jednaćel twarskeje firmy Hentschke Jörg Drews kaž tež twarska měšćanostka Juliane Neumann (njestronjanka), za kotruž pak hižo žaneje łopače njebě.
