Maja dźeń a wjace přidružnikow

srjeda, 07. februara 2024 spisane wot:

Na dnju wotewrjenych duri witachu wuwučowacy a wuknjacy Budyskeho Šulskeho centruma Carity wulku syłu zajimcow. Mjez nimi běchu tež wopytowarjo z migraciskim pozadkom.

Budyšin (CS/SN). „Naše kubłanišćo ma po cyłym Budyšinje, ale tež zwonka města jara dobre mjeno. Přiwšěm nochcemy so dnja wotewrjenych duri wzdać“, wuzběhny nawoda Šulskeho centruma Carity Bertin Rautenberg w swojej wotewrjenskej narěči. Po tym zo bě zarjadowanje za čas korony wupadnyło, wote­wrě zarjadnišćo na Weigangowej 8 – tak, kaž loni hižo – minjenu sobotu zajimcam swoje durje. „Za potencielnych požadarjow je wuměna z tymi, kotřiž tu ­hižo wuknu, esencielna. Wšako zhonja tak z prěnjeje ruki nadrobnosće k wukubłanju“, wón podšmórny.

Ze Stuttgarta do Łužicy

srjeda, 07. februara 2024 spisane wot:
Liljana a Andreas Jaensch zeznaštaj so před wjace hač 30 lětami w Stuttgarće a staj mjeztym hižo 23 lět zbožownaj zmandźelenaj. Rodźeny Drježdźan, kotryž běše wot 1990 w zapadnej Němskej žiwy, a Słowjenka pochadźaca z městačka Kranj, kotraž dźěłaše tehdom w Stuttgarće, rozsudźištaj so wědomje za serbšćinu a žiwjenje we Łužicy. Kupištaj sej dom w Delnim Wujězdźe a załožištaj hospodu. W tutej móža wot spočatka apryla turisća w dwěmaj appartementomaj přebywać. Wobaj Jaenschec mandźelskaj wuknjetaj serbšćinu a chcetaj rěč doma a w swojej hospodźe spěchować. Foto: SN/Bojan Benić

Krótkopowěsće (07.02.24)

srjeda, 07. februara 2024 spisane wot:

Pozdatny nadpad njewěrny

Zhorjelc. Kónc januara kursěrowaše w syći rozprawa wo nadpadźe třoch wukrajnikow na Budyšana, kotryž bu zranjeny. Kuriozne pak běše, zo přizjewi so přez platformu instagram. Policija jeho na to přesłyša a wukopa so, zo běše sej wšitko jenož wumyslił. Nětko ma so 22lětny njewěrneho wuprajenja dla zamołwić. Policija skedźbni w tym zwisku na to, zo „tež w interneće prawo płaći“.

„Filmowe nocy“ wohrožene

Drježdźany. „Filmowe nocy dyrbja być!“ rěka kampanja zarjadowarjow „najwjetšeho kinoweho a koncertoweho festiwala Europy“, kajkuž wčera ze zjawnym listom předstajichu. Z njej reaguja na „politiski rozsud města Drježdźany, najenske zrěčenje njepodlěšić a zarjadowanje přichodnje zjawnje wupisać. Pod tymle wuměnjenjemi je přichod ‚Filmowych nocow při połobskim brjoze‘ pobrachowaceje perspektiwy dla“ wohroženy.“

W zwěrjencu dawaja nowosće

Łaz (AK/SN). „Rjad wuznamnych woso­binow w Domje Zejlerja a Smolerja we Łazu je nětko wo jednu wopomnjensku taflu bohatši.“ Tole podšmórnje před­sydstwo tamnišeho Spěchowanskeho towarstwa Dom Zejlerja a Smolerja. Wjesnjanosta Thomas Leberecht (CDU) a farar Christian Huth poswjećištaj wopomnjensku taflu za čestneho wobydlerja Łaza Heinza Menzela (1928–2022) – zhromadnje z jeho synom Peterom Menzelom.

Heinz Menzel je mnohe lěta jako domizniski ornitologa a domizniski chronist skutkował a je na swójsku iniciatiwu třidźělny spis „Přinoški ke chronice“ wudał. W nadawku Łazowskeje ewangelskeje wosady je wón wo jeje ­stawiznach pisał. Dale je wón žiwjenje Łazowskeho kublerja Alexan­dera Roberta von Loebensteina (1811–1855) přeslědźił a swoje dopóznaća zapisował.

Jónkrótne towarstwo

wutora, 06. februara 2024 spisane wot:

Brětnja/Michałki. Nowe towarstwo za konjacy sport Brětnja/Michałki (PSVBM) je swoje dźěło zahajiło. Wone je nětko do registra towarstwow zapisane. Towarstwo chce předewšěm dźěćom ze socialnje słabšich swójbow zmóžnić, zo wobchad z konjom kaž tež jěchanje nawuknu. Předsydka towarstwa je Romy Belka.

So idejam za fotami bližić

Budyšin. Serbscy muzejownicy přeproša na předposlednje zarjadowanje wosebiteje wustajeńcy „Ducy domoj“ z fotografijemi Jürgena Maćija. Te wotměje so jutře, srjedu 7. februara, wječor w Budyskim Serbskim muzeju. We 18 hodź. powjedźe Jürgen Maćij po wustajeńcy a w 19 hodź. sćěhuje přednošk „,Přistupju a praju sej: Nětko sym tu. Moja legitimacija je foto-aparat‘ – Sektor foto a film w Domje za serbske ludowe wuměłstwo“. Wědomostnicy Serbskeho instituta dr. Theresa Jacobsowa a dr. Ines Kellerowa přednošujetej w němskej rěči.

W Ralbicach hodowne štomiki spalili

wutora, 06. februara 2024 spisane wot:
W katolskich Serbach woswjeći so kónc hodowneho časa 2. februara na swěčk Marije. Nanajpozdźišo na tutym dnju ludźo swoje hodowne štomiki zrumuja. Zašłu sobotu nawječor su wobydlerjo z Ralbic a wokolnych wsow štomiki pod dohladom tamnišeje wohnjoweje wobory spalili. Při kołbasce a wšelakich napojach, su při wohenju pobjesadowali. Wosebje dźěći mějachu swoje wjeselo z toho, woheń ze zesušenymi štomikami „picować“. Foto: Feliks Haza

Myto KiJu za młodźinski klub

wutora, 06. februara 2024 spisane wot:

Radworski młodźinski klub je minjeny pjatk myto za angažement młodźiny w Budyskim wokrjesu přijał, kotrež spožča Syć za dźěći a młodźinu (KiJu) w Biskopicach.

Radwor (SN/MiR). Radworski młodźinski klub – Radworske z.t., kotryž jako towarstwo wot lěta 2000 wobsteji, ma tuchwilu 89 čłonow a čłonkow. Młodostni bytostnje k dwurěčnemu žiwjenju we wsy přinošuja. Woni njewuhotuja jenož tradicionalne swjedźenje kaž chodojtypalenje a mejemjetanje, ale zabawjeja ze swójskimi, zarjadowanjemi mnohich ludźi. Tak přewjeduja w lěću wjacednjowski barowy festiwal. Wšitke zarjadowanja přihotuja a přewjeduja młodostni w serbskej a němskej rěči. Młodostni wot 9. lětnika so w klubje prawidłownje zetkawaja a pěstuja serbsku rěč zwonka šule a swójby.

Móst mjez tradiciju a modernu

wutora, 06. februara 2024 spisane wot:

Z mobilnej dźěłarničku stare rjemjesło módroćišća zachować

Stróža (CS/SN). Wot lěta 2018 słuša ­rjemjesło módroćišća k imaterielnemu swětowemu kulturnemu herbstwu. „Připóznaće tutoho prastareho rjemjesła pak so w eurach a centach njewupłaći. Aktualnje a perspektiwisce ma to skerje ideelnu hódnotu“, rjekny Daniel Häfner, zamołwity za serbske kreatiwne hospodarstwo z Choćebuza, na wotewrjenju wustajeńcy, pjatk w Stróžanskim domje tysac hatow.

Domowina so jasnje wuprajiła

wutora, 06. februara 2024 spisane wot:

Budyšin (SN). Podawki zašłych dnjow a nahlady někotrych skupinow a stronow pohnuwaja Domowinu, so jasnje wuprajić: „Jelizo so prawicarska ideologija, ale tež kóždyžkuli ekstremizm tolerěrujetej, je naša towaršnosć a su naše zakładne prawa wohrožene“, zwurazni předsyda Domowiny Dawid Statnik. Wšelakorosć měnjenjow je žro demokratije. Runje to tuchwilu dožiwjamy – su wšelake skupiny, kotrež na wšelake wašnja spytaja, za swoje měnjenja wabić – hač na dróhach, w parlamentach, w socialnych syćach abo we wosobinskej rozmołwje. Demokratija dowola wšelake měnjenja a je wot kompromisow žiwa. Tola wuprajenja přećiwo čłowjeskim prawam, runohódnosći, ludowej suwereniće, dźělenju mocow a swobodźe njejsu wosobinske měnjenja, ale antidemokratiske wustupowanje.

Wopytowarjo demonstracije za čłowjeskosć, demokratiju a swobodu, sobotu tydźenja w Budyšinje, su začuwali, kak so prawicarjo w stolicy Serbow mocuja. Dyrbimy wo tym rěčeć. Dale rěka w zdźělence: Budyšin je stolica Serbow. Domowina so za to zasadźuje, zo to tež w přichodźe tak wostanje.

Krótkopowěsće (06.02.24)

wutora, 06. februara 2024 spisane wot:

Krabatowe hry wupředate

Čorny Chołmc. Kartki za lětuše Krabatowe hry w Čornym Chołmcu su wupředate. Tamniši kulturny centrum KRABATowy młyn ptzwr, kiž prěni króć jako zarjadowar wustupuje, přeprošuje na inscenaciju „Na spočatku bě swětło“. Dalša nowostka je, zo budu wopytowarjo na trawersach abo za blidami sedźeć. Za domoródnych su prěni króć wosebity kontingent kartkow rezerwowali.

Šuler kubłanišću hrozył

Budyšin. Hroženja z bombu dla dyrbjachu dźěći Budyskeje spěchowanskeje šule na Alberta Einsteinowej kubłanišćo 24. januara wopušćić. Policija běše je kaž tež wučerjow do Serbskeho šulskeho a zetkawanskeho centruma na Listowej ewakuěrowała. Bombu pak fachowcy namakali njejsu. Kaž so nětko wukopa, je šuler mejlku z hroženjom na šulu pósłał.

Politikarjow lěpje škitać

Serbska debata

nowostki LND