Peter Frey, něhdyši šefredaktor sćelaka ZDF, běše rěčnik na lětušim prěnim ­zarjadowanju w rjedźe Budyskich ­narěčow minjeny pjatk w tachantskej cyrkwi. Swoju narěč je pod hesło ­„Žurnalizm – wobškodźeny stołp ­demokratije“ stajił.

Budyšin (CS/SN). „Žurnalizm je w fazy přechoda a wohroženja“, zwěsći Peter Frey w swojej narěči před připosłucharjemi w derje pjelnjenej tachantskej cyrkwi. Socialne medije maja dale a wjetši wliw w našej towaršnosći, „nochce pak so mi je ‚socialne‘ mjenować, přetož mam je poprawom za njesocialne“, wón podšmórny a doda, zo rěči radšo wo digitalnych medijach. Nichtó njepřewozmje zamołwitosć za to, štož tam wozjewjeja. Tež žurnalistiska neutralita w nich njeeksistuje. Hla­dajo na situaciju digitalnych medijow w USA ma Frey prócowanja EU, tute lěpje regulować, za ćim wažniše.

Informaciske zarjadowanje wo strašnym šeršenju w Njeswačidle

Njeswačidło (SN/MiR). Informacije wo aziskim šeršenju (łać. vespa velutina) su trěbne. Nimale 140 zajimcow a zajimčow bě sej wčera wječor do Njeswačidła do tamnišeho Knježeho hosćenca dojěło, zo bychu wo insekće zhonili. Fachowča Marion Loeper je přitomnym domjace wosy a šeršenje a jich wašnje žiwjenja zbližiła. Jednaćelka Njeswačanskeje přirodoškitneje stacije a pčołarka Angelika Schröter rjekny: „Sym wulkeho zajima z gmejny a susodnych gmejnow dla přemóžena.“ Mjez wopytowarjemi zarjadowanja běchu tež hosćo ze Zhorjelskich a Drježdźanskich kónčin a tójšto Serbow. Tak rjekny Jan Wjesela z Chrósćic: „Sym sej poměrnje wěsty, zo rozšěrjenju tohole šeršenja zadźěwać njemóžemy. Wažne je wědźeć, kak so jemu wobaramy, zo njebychu naše pčołkace ludy hinyli.“ Marion Loeper měješe wotmołwy, zwjazujo je z namołwu na pčołarjow. Jedna móžnosć so šeršenjej wobarać je, jeho hnězdo sčasom wuslědźić. Wšitcy ludźo měli wědźeć, kajki šeršeń wupada a kak so wot tudy dawno zasydlenych insektow rozeznawa.

Budyšin (SN/BŠe). Z wulkim zadźiwanjom je syć za demokratiju a wšelakorosć tvBUNT překwapjacy rozsud krajnoradneho zarjada Budyskeho wokrjesa na wědomje brała. Tak je wokrjes hižo při­zwolene spěchowanje projekta z titlom „Partnerstwa za demokratiju“ cofnył. Regionalny koordinator a fachowc za spěchowanje demokratije we wjesnych kónčinach Christian Schäfer twjerdźi, zo njeje tole wotewrjeny politiski rozsud. Za to je poprawom wothłosowanje wokrjesneho sejmika trěbne. „Skerje je tomu tak, zo jednotliwe wosoby w zarjadnistwje swójskej politiskej agendźe sćěhuja a z tym wažne towaršnostne projekty krótkodobnje po swojej woli zakónča“, rěka w nowinskej zdźělence tvBUNT Budyskeho wokrjesa. Projekt płaći 250 000 eurow. Cyłkownje 200 000 eurow je přez spěchowanske srědki zaručene. Zbytne 50 000 eurow dyrbi wokrjes sam zwjesć, štož njeje hižo móžno.

Koncern so na přichod hotuje

Choćebuz. Dohladowanska rada a hłowne zhromadźizny předewzaća Łužiska energija a milinarnje (LEAG) su wčera kurs změny koncerna wobkrućili a nowu strukturu wobzamknyli. LEAG so strategisce znowa wusměri a chce kupcam naslědne energijowe móžnosće poskićić a zastaransku wěstotu zaručić. Brunica změje dale wulki podźěl na tym.

Kak dale ze serbskej rjadownju?

Radwor. K druhemu razej su so zastupjerjo gmejny, Domowiny, staršich, pěstowarnjow a šulow wčera schadźowali, zo bychu wo přichodźe serbskich rjadownjow w Radworju wuradźowali. W přichodnym šulskim lěće wočakuja sylny 1. lětnik, tak zo zda so serbska rjadownja zaručena być. Wot 2026/27 budźe zaso wužadanje, serbsku rjadownju najebać mału ličbu šulskich nowačkow zaručić.

Zajim za Ukrainu woteběra