Spěchowanske towarstwo zetkawanišća Dom Zejlerja a Smolerja přeslědźi 200 lět stary poezijowy album

Horjeka srjedźa steji słowo „lubosć“. Zboka plećetej so słowje „wěra“ a „nadźija“. Wjacore zapiski na stronje su we łaćonšćinje napisane. „Wer nicht liebt Wein, Weib und Gesang, der bleibt ein Narr sein lebenlang“, pisaše Jan-Arnošt Smoler (1816–1884) jako student dnja 26. septembra 1836 wjesołeje mysle do poezijoweho albuma. Wobsydnik albuma rěkaše ze swójbnym mjenom Görne, předmjeno dotal znate njeje. Lědma 20lětny Smoler je tehdy ewangelsku teologiju we Wrócławju studował. Jeho zapisk je jedyn z mnohich w jónkrótnej knižce. Z posrědkowanjom chronista Siegfrieda Dankhoffa z Friedersdorfa je jón Volker Kunert z Drježdźan nětko Spěchowanskemu towarstwu zetkawanišćo Dom Zejlerja a Smolerja přewostajił.

Volker Kunert

Berlin/Choćebuz (SN/at). Nawoda mjeńšinoweho sekretariata w Berlinje, Měto Nowak, zastojnstwo kónc měsaca złoži. Dźensa měješe posledni dźěłowy dźeń, našej redakciji zdźěli. Domowina, kotraž je za zarjadnišćo zamołwita, njeje so k naležnosći dotal hišće wuprajiła.

Wot 1. awgusta budźe Měto Nowak přistajeny w Serbskim instituće. To jeho direktor, prof. dr. Hauke Bartels, našemu wječornikej wobkrući. Nowak naslěduje we wotrjedźe regionalne wuwiće a mjeńšinowy škit dr. Jean-Rémija Carbonneauwa, kotryž bu w Kanadźe na profesora powołany a we Łužicy hižo njedźěła. Nazhonjenja na polu rěčneje politiki kwalifikuja Nowaka za nowy dźěłowy nadawk, kotryž wopřija hłownje tute wobłuki.

Njechorń (SN/at). Dźensa před 25 lětami, 19. junija 1999, bu Dom Měrćina Nowaka-Njechorńskeho po wobšěrnych zachowanskich a wobnowjenskich dźěłach zjawnosći jako muzej a schadźowanišćo přepodaty. Areal je pokład za Domowinjanow w narańšich kónčinach župy „Jan Arnošt Smoler“. Mjez tym staja so tam znowa prašenje „Kak dale z domom?“, a to pod wšelkimaj aspektomaj.

Z předmjetom zaběrachu so čłonojo předsydstwa Budyskeje župy na wuradźowanju wčera w Njechornju. Pozicija předsydstwa je jasna. Zetkawanišćo je wažne, hewak ludźo cyle na serbske korjenje w kónčinje zabudu, regionalna rěčnica Domowiny Katja Liznarjec zdźěli. Župa ma nětko stejišćo zdźěłać, dokelž dyrbjał so dom wotwonka w murjach runje tak kaž wotnutřka ponowić. „W drjewje tykowaneho domu je škódnik, kiž móže jenož fachowc z wosebitymi maćiznami wotstronić“, wuzběhny Katja Liznarjec. Župne předsydstwo namjetuje nětko ideje zběrać, za što hodźi so dom w přichodźe wužiwać. Za to chcedźa wjesnjanow a wšitkich zajimowanych Serbow nazymu na dźěłarničku přeprosyć.

Serbske Drježdźanske towarstwo „Stup dale“ ma nowe předsydstwo. Hłowna zhromadźizna zašłu srjedu wuzwoli Christopha Cyža jako předsydu, Nadju Herbigowu jako městopředsydku, Jakuba Hrjehorja a Jadwigu Pjacec jako pokładnikow. Z tym je towarstwo po ćežkim času wobnowjene a móže so dale za swoje naležnosće zasadźować. Spočatk lěta 2023 je towarstwo dnjowsku dźěćacu skupinu samsneho mjena w Drježdźanach-Nowym Měsće wuspěšnje do nošerstwa SŠT přepodało a přez crowdfunding za pjenježne dary wabiło. Dnjowa skupina je tuchwilu połnje wobsadźena. Financielna podpěra dnjowskeje skupiny a zhromadne dźěło ze SŠT dale pokročuje. Hač do 2023 je towarstwo za serbske šulske dźěći z Drježdźan w zhromadnym dźěle z Krajnym zarjadom za šulu a kubłanje online-wučbu poskićiło. Tutón poskitk chcedźa zaměrnje wobnowić a polěpšić. Tež „šulu w zelenym“, zetkanje dźěći we Wulkej zahrodźe, chcedźa dale wjesć. Towarstwo budźe za móžnosćemi prezencneje wučby w Drježdźanach pytać, inkluziwnje šulerskeho transporta.