Babylěćo wulki wothłós žnjało
Lěpšeho pomjenowanja hač babylěćo drje njemóhli Ralbičenjo za swój wot lěta 2002 stajnje w septembru přewjedowany wjesny swjedźeń nańć. Mjeztym zo bě loni na wšěch třoch dnjach swjedźenja chětro horco było, dyrbjachu so wopytowarjo lětsa trochu ćoplišu drastu woblec.
Ralbicy (aha/SN). K zazběhej pjatk wječor nastupi 14 wohnjowych woborow, mjez nimi pjeć dorostowych, k hašenskemu wubědźowanju pod swětłomjetakami. Najlěpje wotrěznychu wobornicy z delnich Sulšec před skupinu z Róžanta/Sernjan a zastupnistwom ze Smjerdźaceje. Mjez młodźinskimi cyłkami wobsadźi dorost z Pěskec prěnje městno.
Sobotu su štyri mustwa w ludobulu mocy měrili, a wječor witaše wjesna předstejićerka Hana Krawcowa hosći w połnje wobsadźenym stanje na dwuhodźinski program. Tradicionelnje wuhotowa jón něhdźe 50 sobuskutkowacych wšěch generacijow. Hana Krawcowa program přewažnje serbsce moderěrowaše. Swój dźesaćlětny jubilej swjećeše wjesna kapała Brodače. Wjele připóznaća žněješe wot wjesnych muži nawjerćany widejofilm „Wjelk přećiwo hajnikam“.
Wopominaja Křesćana Kubicu
Spale (AK/SN). Narowny kamjeń z wopomjatnej taflu hnydom napadnje. Pódla zachoda do kapałki na Spalowskim kěrchowje dopomina wón na serbskeho ewangelskeho fararja Křesćana Kubicu (1805–1861). „To je hódne městno. Křesćan Kubica je jedna ze Spalowskich historiskich wosobinow. Na te wašnje jeho hódnje wopominamy“, praji wjesny chronist Reinhold Weise, čłon Spalowskeho domizniskeho towarstwa. Jeho čłonojo su narowny kamjeń do Spal přenjesli a jón při kapałce nastajili. Nimo toho připrawichu informacisku taflu. Trěbne 450 eurow je towarstwo najprjedy raz same zapłaćiło.
Něhdyši minister měł pomhać
Wjesna rada přihotuje naprašowanje a informaciske zarjadowanja
Trjebin (AK/SN). Kónc decembra ma nowa městnosć za wot brunicoweje jamy Wochozy II potrjecheny Miłoraz wěsta być. Tole podšmórny wjesny předstejićer Waldemar Locke na zašłym posedźenju Trjebinskeje gmejnskeje rady. „Tuchwilu faworizuje 78 procentow wšěch Miłorazanow přesydlenje do Slepoho. Koncern LEAG pak by tež Trjebin za móžnu sydlensku městnosć měł“, wón rozłoži.
Miłoražanska wjesna rada, Locke potwjerdźi, ma městnosć w sewjernym dźělu Slepoho za najkmańšu. Tam měješe Nowe Rowno nastać. Tež Zhorjelski krajnoradny zarjad móhł tomu přihłosować. „Spjelnimy nětko swoje domjace nadawki a přewjedźemy naprašowanje“, praji předstejićer. Najprjedy chcedźa naprašniki zdźěłać, potom na informaciske zarjadowanje přeprosyć a skónčnje naprašniki wobydlerjam rozdźělić. Njewotwisny běrow ma tole přewodźeć.
Krótkopowěsće (11.09.17)
Dale z titlom UNESCO
Stróža. Biosferowy rezerwat Hornjołužiska hola a haty je na dalše dźesać lět „biosferowy rezerwat UNESCO“. Po wuspěšnej ewaluaciji přepoda Margret Brahms, čłonka narodneho komiteja Man-and-Biosphere, na sobotnych přirodowych wikach w Stróži wotpowědne wopismo sakskemu ministrej za wobswět Thomasej Schmidtej (CDU).
Wjelk do wowčernje so zadobył
Budyšin. Krajny rada wokrjesa Budyšina Michael Harig (CDU) bě hakle minjeny pjatk sakskemu wobswětowemu ministerstwu próstwu zapodał, na wjelki Róžeńčanskeje črjódy třěleć směć. Jeničce dźeń pozdźišo, w nocy na njedźelu, zadoby so wjelk do wowčernje na Šunowskim klóšterskim kuble. Jednu wowcu na łuce je rubježne zwěrjo nimale dospołnje zežrało. Paniki we wowčerni dla je jehnjo zahinyło.
Nowe pišćele zaklinčeli
Policija (11.09.17)
Z městna njezboža pěši ćeknyła
Minakał. 34lětna žona bě we wčerawšich rańšich hodźinach mjez Minakałom a Lipičom po puću, jako ze swojim Suzukijom z jězdnje zajědźe a do štoma prasny. Zraniła drje so šoferka njeje, na awće pak nasta něhdźe 10 000 eurow škody. Žona městno njezboža na to pěši wopušći a nóžkowaše domoj. Tam ju policija pozdźišo wuslědźi. Při kontroli zastojnicy zwěsćichu, zo wšak měješe wona 1,84 promilow alkohola w kreji.
80 młodostnych firmował
Chrósćicy. Drježdźansko-Mišnjanski biskop Heinrich Timmerevers je wčera w Chrósćicach 80 młodostnym sakrament firmowanja wudźělił. Tež holcy a hólcy klóšterskeje wikarije běchu mjez firmujomnymi. Wjetšina holcow bě w družčej drasće. Tójšto kmótrow bě tohorunja w swjedźenskej drasće. Božu mšu wobrubił je Chróšćanski cyrkwinski chór. Bernadet Hencyna je jón posledni raz nawjedowała. Za wjelelětne spomóžne skutkowanje je so jej wosadny farar Měrćin Deleńk wutrobnje dźakował.
Zetkać a so serbsce rozmołwjeć
Berlin. Přichodne Serbske blido wotměje so štwórtk, 14. septembra, w 16 hodź. w hosćencu EINSTEIN KAFFEE na Friedrichowej 206. Hosćenc je direktnje pódla bywšeho namjezneho přechoda Checkpoint Charlie. Štóž ma lóšt a chwile so na měsačnych zetkanjach k hajenju maćeršćiny w cuzbje wobdźělić, je lubje witany. Po tym zo su so wjacori ze stolicy a wokoliny w lětnich prózdninach na rěčnych kursach hornjo- abo delnjoserbšćiny wobdźělili, maja za Serbskim blidom dobru składnosć, swoje kmanosće nałožować a skrućeć.
Kulowska młodźinska wohnjowa wobora wobdźěli so zajutřišim, ...
Žadaja sej přetwar křižowanišća
Křižowanišćo na statnej dróze S 94 pola Jěžowa je po wospjetnym njezbožu znowa w diskusiji. Zjawne zarjadnistwa pak njewidźa trěbnosć, tam něšto změnić.
Kamjenc (UM/SN). Wjele lět płaćeše křižowanišćo Kamjenskeje wobjězdki pola Jěžowa jako „katastrofowe“. Lěta 2005 běchu je zjawnosći přepodali, hižo lěto pozdźišo pak přijězd z Jěžowa zawrěchu. Přičina bě přewjele njezbožow w krótkim času. Z maksimalnje lěto planowaneho zawrjenja bu sydom lět. Hakle w juniju 2013 křižowanišćo wotewrěchu, po tym zo běchu tam swobodny wid zaraćili a šoferow tak k pomałšemu jězdźenju nuzowali.
Štož hewak widźeć njeje
Wulka ličba wotewrjenych pomnikow wabi njedźelu na wopyt
Budyšin (SN/MWj). „Móc a pycha“ je hesło lětušeho dnja wotewrjeneho pomnika, w kotrehož wobłuku budu zajutřišim, njedźelu, najwšelakoriše cyrkwje, wěže a dalše twarjenja wotewrjene, do kotrychž hewak njepřińdźeš. W Budyšinje na přikład budu krajnostawske domy na Hrodowskej přistupne, žurla přisažneho sudnistwa w Serbskim muzeju, stukowa žurla na susodnym Hrodźe, něhdyši krajnostawski seminar, hdźež je dźensa powołanskošulski centrum zaměstnjeny, Britzec zahroda za Serbskim institutom a dalše městnosće. W něhdyšim stasijastwje rozprawjeja něhdyši politiscy jeći, kak běchu woni móc a namóc dožiwili. Cyłkowny přehlad wšitkich wotewrjenych pomnikow sprjewineho města je zapřijaty we wosebitej brošurce, kotruž dóstanu zajimcy w měšćanskej informaciji a w mnohich wobchodach. Powotpočnyć móža so wopytowarjo cyły dźeń na Hłownym torhošću před radnicu. Tam změja gastronomiske zastaranje, hudźbu a wjele zaběrow za dźěći.
22. swěčkowy swjedźeń w Njeswačanskim parku
Njeswačidło. Mjeztym 22. swěčkowy swjedźeń wotměje so jutře, sobotu, w Njeswačanskim hrodowym parku. Drježdźanski chór The Gospel Passengers zawjeseli wopytowarjow hižo wot 18.30 hodź. na łuce při hrodźe. Při ćmičkanju wobswětla potom park z tysacami swěčkow a ze smólnicami. Po koncerće stej wohnjowa show kaž tež mjeńši wohnjostroj planowanej.
W hrodowej pincy móžeće do ranja rejwać. Towarstwo přećelow domizny a kultury Njeswačidło so na mnohich wopytowarjow wjeseli.
