Kaž Budyske měšćanske zarjadnistwo wudźeržuje tež Njewotwisny zwjazk seniorow wokrjesa Budyšin hižo lětdźesatki dobre zwiski k senioram partnerskeho města Jablonec nad Nisou. Kóždolětnje so z horstku sobustawow mjez sobu wopytujemy a přežiwjamy zhromadnje rjany dźeń w susodnym kraju.

Njedawno poda so 26 seniorow z Budyšina do Jabloneca, hdźež nas lubje witachu. Přišoł bě tohorunja tamniši wyši měšćanosta Petr Beitl a dari kóždemu z nas němskorěčnu chroniku města. Při tej składnosći wobě stronje hišće raz po­twjerdźištej, zo chcetej přećelske styki a wopyty dale pěstować.

Sydlišćo Wossinka słuša gmejnje Jabłońc/Kromola a leži direktnje při braniborskej krajnej mjezy blisko Běłeje Wody k Sakskej. Blisko sydlišća nadeńdźemy jěchanski dwór „Zum Tannengrund“, kotryž Ines Lisk wobhospodarja. Něhdy bě na samsnym městnje burski statok, wo kotryž so wjacore generacije Liskec swójby starachu. Priwatny ratarski zawod přeń­dźe najprjedy do rukow prodrustwa typa I. Pozdźišo dźěłaše přichodna mać Ines Lisk w běrnjacym domje Brězowsko-Jabłońčansko-Źěwinkskeho agrarneho drustwa. Wšitke wsy přisłušachu Choćebuskemu wobwodej. Tež lěsnistwo, w kotrymž přichodny nan dźensnišeje mějićelki jěchanskeho dwora we Wossince dźěłaše, měješe Choćebuske zarjadnistwo na starosći.

Město Wojerecy chce klětu swój 750. jubilej hódnje woswjećić. Za to je měšćanska rada wčera koncept wobzamknyła. Nimo toho přepodachu zwěrjencowej a kulturnej towaršnosći nadawk, swjedźeń­ organizować.

Wojerecy (AK/SN). Z wufilowanym konceptom chce město Wojerecy klětu 750. róčnicu wobstaća swjećić. „Je to jubilej cyłeje měšćanskeje towaršnosće. Ćežišćo budźe swjedźenski tydźeń w septembru, k čemuž sej tež hosći z partnerskich komunow přeprosymy.“ Tole podšmórny socialny měšćanosta Thomas Delling, kiž nawjeduje dźěłowu skupinu 750 lět Wojerecy, na wčerawšim posedźenju měšćanskich radźićelow. Woni při sydom wzda­tych hłosach frakcije CDU a Mi­chaela Rennera (Aktiwne Wojerecy) wobzamknychu, zo ma tamniša zwěrjencowa a kulturna towaršnosć swjedźeń přiho­tować a přewjesć.

Budyšin (JK/SN). Mnohe hrjebje, wosebje podłu gmejnskich pućow, njejsu hižo w tym stawje, zo bychu wotpowědowali swojej bytostnej funkciji: wotwodźeć wodu po zliwkach z dróhow a polow do směra na přichodnu wjetšu rěku. Přiběrajcy jewjachu so na wuradźowanjach gmejnskich radow Budyskeho wokrjesa w minjenych měsacach žadanja woby­dlerjow a radźićelow za tym, zhromadnje postupować, zo bychu přirowy podłu dróhow zaso fungowali. W zajimje škita ludnosće kaž tež towaršnostnych a priwatnych zajimow je trjeba so tomule nadawkej na wsach zhromadnje wěnować.

W Njeswačanskej gmejnje maja hižo dobre nazhonjenja zhromadnje ze Zarěčanskim ratarskim zawodom. Njedaloko Łuha znowa wuzběhane přirowy zamóža nětko wulke mnóstwa wody přiwzać a bjez stracha za wobsydstwo wobydlerjow wodu do bliskich přirodnych rěčnišćow wotwjesć. Tež ratarske zawody maja swój wužitk z toho. Dobra póda zwostawa na polu abo znajmjeńša w přirowje. Tak njetrjebaja přidatnje dróhi a puće rjedźić a drohotnu zemju zaso wróćo na pola wozyć.