Krótkopowěsće (25.08.17)
Dožiwić swědkow holocausta
Drježdźany. Přežiwjency holocausta chcedźa přichodny tydźeń znowa sakske šule wopytać. Kaž kultusowe ministerstwo informuje, budu časowi swědcy šulerjam wo swojich nazhonjenjach w jastwach a koncentraciskich lěhwach powědać. Na cyłkownje pjeć kubłanskich zarjadnišćach swobodneho stata su tajke rozmołwy předwidźane.
W nowej hali dźěłaja
Rušica. Dodawaćel awtomobilow Linde&Wiemann w Rušicy pola Halštrowa dźěła wot dźensnišeho w swojej nowej hali. Cyłkownje 40 milionow eurow je zawod do noweho twarjenja inwestował, jedyn dźěl ze spěchowanskich srědkow. W tworni dźěła 220 ludźi. Wot klětušeho chcedźa tam ze serijowej produkciju awtowych dźělow započeć. Hač do toho tam na probu dźěłaja.
Twarstwo so derje wuwiwa
Lipsk. Wobchodnistwo w sakskej twarskej branši je so w prěnim połlěće 2017 pozitiwnje wuwiło. Kaž twarski industrijowy zwjazk dźensa w Lipsku zdźěli, je wobjim wo 7,4 procenty porno lońšemu rozrostł, štož wučinja nimale 2,5 miliardow eurow. Wosebje wobłuk bydlenjotwara je so nadpřerěznje wuwił.
Policija (25.08.17)
Granaty rozbuchnyli
Křidoł. Na polu pola Křidoła (Schiedel) blisko Kamjenca su wčera dopołdnja wjace hač 50 tankowych granatow pod kontrolu rozbuchnyli. Relikty z Druheje swětoweje wójny běchu tam lětdźesatki w zemi leželi. Za čas rozbuchnjenja je policija Wóslinčansku dróhu zawrěła.
Padustwo zwrěšćiło
Wojerecy. W nocy na srjedu běchu njeznaći na Budyskej aleji we Wojerecach podarmo spytali, wosoboweho awto typa Honda Civic pokradnyć. Jim drje so poradźi, so do awta zadobyć, motor pak zaswěćić njemóžachu. Při wjacorych pospytach wobškodźichu zamk. Kelko škody je nastało, njeje znate.
Słowjanskosć w němčinje
Budyšin. Klub wuchowarjow rěče přeproša na přednošk pod hesłom „Słowjanskosć w němskim słowoskładźe“. Referentka je Iris Adler ze Załomja, čłonka předsydstwa Němskeho zwjazka wučerjow rušćiny. Zarjadowanje wotměje so wutoru, 29. awgusta, w 19 hodź. w rumnosćach towarstwa Swětłownja Majak na Budyskej Nagelowej 1 (zachod naprawo pódla kubłanskeje agentury). Zastup je darmotny. Wot 18.30 hodź. budźe móžno sej towarstwowe rumnosće wobhladać.
Poskićeja kursy čěšćiny
Smjerdźaca. Wječorne kursy čěšćiny z maćernorěčnym čěšćinarjom poskići Rěčny centrum WITAJ wot 18. septembra stajnje póndźelu wot 17 do 18.30 hodź. w Smjerdźacej a wutoru w Budyšinje wot 16.30 do 18 hodź. za pokročenych a wot 18.30 do 20 hodź. za započatkarjow. Přizjewjenja přijimuja w RCW pod telefonowym čisłom 03591/ 550 400 abo emailnje pod .
Edit Pjenkowa w Rownom je hospoza z ćěłom a dušu a chwali sej ...
Změja kupjel pod hołym njebjom?
Město Kamjenc intensiwnje pruwuje, hač hodźi so teren při halowej kupjeli za to wužiwać, tam kupjel pod hołym njebjom twarić. Woprawdźe nowa wšak tale ideja njeje.
Kamjenc (UM/SN). Město Kamjenc chce sej móžnosć wobchować, halowu kupjel na Macherowej z wonkownymi připrawami rozšěrić. Tole wuchadźa z naćiska twarskeho plana za sewjerny dźěl zarjadniskeho centruma. Srjedźo- abo dołhodobnje móžne rozšěrjenje móhło „łuki za hrajkanje, dźěćacy basenk, sawnowu krajinu a přidatne parkowanišća wopřijeć“, w naćisku rěka. Na druhim městnje je samo wo kupjeli pod hołym njebjom rěč. Wuchadźišćo je „přeće mnohich Kamjenčanow, z kupjelu wólnočasny poskitk w měsće wudospołnić“.
Dołh zaměrnje pomjeńšeja
Połlětna rozprawa města Kulowa swědči wo solidnym hospodarjenju
Kulow (AK/SN). W prěnim połlěće 2017 je město Kulow solidnje a disciplinowanje hospodariło. Tole podšmórny komornik Thomas Woelke na wčerawšim posedźenju měšćanskeje rady w Dubrjenskim kulturnym domje w swojej połlětnej rozprawje k hospodarskemu planej 2017. „W zarjadniskim wobłuku so dochody a wudawki nimale runaja“, wón rozłoži. „Hinak je při inwesticijach. Te najprjedy raz jako město financujemy. Štož bě planowane, je so tež zwoprawdźiło a dyrbi so nětko refinancować.“
Při saněrowanju Krabatoweje zakładneje šule su třěchu, tepjensku připrawu a elektriku ponowili. Po słowach komornika su twarske firmy za čas prózdnin pilnje dźěłali. Kaž planowane su spočatk awgusta hort na přetwarjenym Starym dwórnišću přepodali. Minjeny pjatk, tak rozprawješe měšćanosta Markus Posch (CDU), zatwarichu w sportowni nowu přewětrjensku připrawu. „Wšitko je derje fungowało.“
Rozmysluja wo wustawkach
Chrósćicy (JK/SN). W kóždej legislaturnej periodźe gmejnskich radow maja so komunalne wustawki přepruwować a na potrjebu a dźěławosć gmejnskeje rady wusměrić. Na njedawnym posedźenju Chróšćanskich gmejnskich radźićelow wjesnjanosta Marko Kliman (CDU) na to skedźbni, zo je při čitanju wustawkow namakał někotre pasaže, kiž načasnym postajenjam hižo njewotpowěduja abo kotrež měli jasnišo sfomulowane być.
Nadawki wjesnjanosty njejsu we wustawkach hižo tak zapisane, kaž je tuchwilne zarjadniske předpisy rjaduja. Wulki dźěl zarjadniskeho dźěła wjesnjanostow wukonja hižo tójšto lět zarjadniski zwjazk Při Klóšterskej wodźe. Jenož hišće cyle konkretnje na gmejnu wusměrjene nadawki a rozsudy zamołwja wjesnjanosta. Běžne zarjadnistwo kaž knihowanje a statistiske rozprawnistwo přewozmje za gmejny centrala w Pančicach-Kukowje. Wažne je, zo so we wustawkach rjaduje, w kotrej měrje wobydlerjo w komunalnym dźěle sobu skutkuja. Wopřijeća kaž wobydler abo wjesnjan maja so we wustawkach jasnje zakótwić.
Za wosebite posedźenje so hłosy množa
Budyšin (SN/at). Frakcija SPD/Zelenych Budyskeho wokrjesneho sejmika žada sej wosebite posedźenje, zo bychu Uda Wićaza jako prěnjeho přirjadnika krajneho rady wotwolili. Tole su wčera wječor na wurjadnym frakciskim posedźenju w krajnoradnym zarjedźe jednohłósnje wobzamknyli, kaž radźićel Roland Fleischer našemu wječornikej wobkrući.
Dowěrliwe wobchadźenje přirjadnika ze znatymi prawicarskimi ekstremistami, kajkež wosebje ze znatych chatowych protokolow wuchadźa, sčinja zastupowaceho krajneho radu njeznjesliweho, rozłoži frakciski předsyda Gerhard Lemm. Wot prěnjeho přirjadnika podate wusprawnjenje, zo chcyše deeskalěrować, frakciju scyła njepřeswědči.
Lemm je hnydom po posedźenju pola předsydy frakcije Lěwicy Ralpha Büchnera wo podpěru wabił a za naležnosć tež wotewrjenej wuši našoł. Wurjadne posedźenje frakcije Lěwicy ke kawsy Wićaz je dźensa wječor, jeje přihłosowanje zda so być jenož formalna naležnosć.
Krótkopowěsće (24.08.17)
Poskićeja znowa dalekubłanja
Smjerdźaca. Nowy semester na Serbskim kubłanskim srjedźišću LIPA w Smjerdźacej je minjeny tydźeń zaběžał. Mjez nimale 70 strowotniskim kursami a tajkimi k wukmanjenju serbskeje rěče organizuje zarjadnišćo znowa dalekubłanja za kubłarjow kaž tež kruh za maćerje a dźěći. Planowej stej tohorunja kubłanskej wuprawje.
Trjebaja noweho šefa
Budyšin. Budyski policajski rewěr trjeba noweho nawodu. Dotalny, Uwe Kilz, bu po dobrym lěće do Drježdźan přesadźeny. Tam steji wón na čole 1. wotrjada hotowostneje policije, kaž sakske ministerstwo nutřkowneho wobkrući. Kilz bě loni kritiku wubudźił, dokelž mjenowaše wukročenja prawicarskich skupin na Žitnych wikach „eventy wuzběhowacych młodostnych“.
Přetrjeba sele přewulka
Policija (24.08.17)
Bungalowaj so wotpaliłoj
Wojerecy. Wohnjowych wobornikow a policiju su wčera wječor we Wojerecach wołali, dokelž so w jednym zahrodnišću dwaj bungalowaj paleštej. Jako kameradojo přijědźechu, běchu so płomjenja we woběmaj, něhdźe 400 metrow wot so zdalenymaj bungalowomaj połnje rozpřestrěli. Byrnjež hnydom hašeć započeli, stej so domčkaj dospołnje wotpaliłoj. Zranił so nichtó njeje. Za přičinami wohenja tam dźensa slědźachu.
