Krótkopowěsće (22.08.17)
Zajim přiběra
Pančicy-Kukow/Budyšin. Zajim za nawuknjenje serbšćiny přiběra. To zwěsći Rěčny centrum WITAJ na zakładźe přizjewjenjow za nowe rěčne kursy. Tak wuknje 18 zajimcow wot wčerawšeho w Pančicach-Kukowje zakłady serbskeje rěče. Dalši zakładny kurs zahaja přichodny měsac w Budyšinje. Za njón je so jědnaće wobdźělnikow přizjewiło.
Zawrjene pasmo wukazane
Wojerecy. Budyski zarjad za dohladowanje žiwidłow a weterinarny zarjad stej wčera za dźěle města Wojerec, za Ćisk a płoniny hač k Spalam zawrjene pasmo wukazałoj. Přičina je epidemija ameriskeho hniłca (Faulbrut) w jednym pčolacym ludźe. Pčołarjo njesmědźa pčołki do a z pasma won wozyć. Za pčołki strašna mrětwa pak čłowjeka njewohroža.
Wopytowarstwo stabilne
Baršć. Ličby hosći Róžoweje zahrody Baršć su wobstajne. Hač do spočatka awgusta mějachu jenak wjele wopytowarjow kaž loni. Nowy rekord docpěchu na lětušich swjedźenskich dnjach kónc junija. Z 15 500 bě je něhdźe 5 000 wjac ludźi wopytało hač hewak. Zajimawosć je, zo pochadźa kóždy wosmy wopytowar róžoweje zahrody z Pólskeje.
Policija (22.08.17)
Z awta třělał
Wojerecy. W nocy na minjenu sobotu je młody šofer wosoboweho awta nuzowe čisło policije zazwonił, dokelž bě něchtó ze za nim jěduceho BMWja třělał. 21lětny bě z třomi sobujěducymi na Halštrowskej dróze do směra na Narć po puću, jako wjacore wutřěle słyšeše a błyski pistole w špihelu widźeše. Alarmowana wobsadka policajskeho awta při tankowni na Grodkowskej šoseji wopisany BMW a jeho 21lětneho wodźerja zadźerža a kontrolowaše. W jězdźidle namaka wona trašawku a wotpowědnu municiju. Dowolnosć, tajku pistolu wobsedźeć, młody muž njeměješe. Tohodla zastojnicy pistolu a municiju sćazachu. Kriminalna policija tónle pad nětko nadrobnišo přepytuje.
Třeća a poslednja etapa lětušeje oldtimeroweje rallyeje Sachsen ...
Jěcharjo a korejty so wubědźowali
Dubrjenk (HH/SN). Šesty raz je Dubrjenska Krječmarjec hosćencarska swójba wčera dworowy swjedźeń wuhotowała. Do wsy z ani sto wobydlerjemi přijědźe wjacore razy telko wopytowarjow. Woni njewužiwachu jeno składnosć, w Krječmarjec hosćencu powobjedować, ale su sej tam tež kofej a tykanc słodźeć dali. Na wšěch dwanaće bě Beata Krječmarjowa napjekła, jeničce něšto kuskow torty na kóncu zby.
Wjeršk běchu konjace wubědźowanja na łuce za hosćencom. Při kałanju wěnca startowaše dwanaće jěcharjow ze swojim konjom. Jenička žona mjez nimi bě Katarina Korjenkec z Ralbic. Dobyła drje wona njeje, je pak přiwšěm dosć derje wobstała. Najwuspěšniši bě Fabian Šnabl z Kulowa, kiž we wšěch pjeć kołach wěnc wottorhny. Druhe městno wobsadźi Andreas Metasch z Němcow, třeće Stefan Kurjat ze Šunowa.
W klóšterskej zahrodźe wšitko kołowokoło zelow
Pančicy-Kukow (BW/SN). Kóždolětna zelowa njedźela, po dobrej tradiciji organizowana wo Křesćansko-socialneho kubłanskeho skutka (CSB), je wčera po informacijach zarjadowarja něhdźe 1 300 wopytowarjow do klóšterskeje zahrody w Pančicach-Kukowje přiwabiła. Wjace zajimcow hač tamne lěta bě tónraz z Radworja a Chrósćic kaž tež z wokolnych wsow, zo bychu swojeho bywšeho fararja a dźensnišeho Kamjeničanskeho propsta Clemensa Hrjehorja zetkali. Wón je hromadźe z wyšim krajnym cyrkwinskim radu Dietrichom Bauerom z Drježdźan ekumeniski nyšpor swjećił. W prědowanju zaběraše so Dietrich Bauer z rjanosću stwórby a z rjanosću čłowjeka, kotraž so w běhu jeho žiwjenja wuwiwa. Clemens Hrjehor na to jenož kwětki a zela we wołtarnišću pod hołym njebjom njepožohnowa, ale dźěše tohorunja přez rynki kemšerjow a jich zelowe kwěćelki pokrjepi. Na nutrnosći zaspěwachu wěriwi zhromadnje serbski kěrluš „Budź Kralowna nam witana“. Za angažement dźakowaše so sobudźěłaćerka CSB Sonja Hejdušcyna, kotraž tohorunja serbske próstwy čitaše, duchownymaj z dopomnjenku.
Na wopyće pola bywšeho fararja
Přirodna jednorosć
Krótkopowěsće (21.08.17)
Poradźeny zazběh
Bórkowy. Wjac hač 5 200 ludźi je sej kónc tydźenja na prěnim „Festiwalu twaroh a lany wolij“ w Bórkowach błótowske wjesne žiwjenje wotkryło. To zdźěli zarjadowar pool production. Cyłkownje 51 wikowarjow, rjemjeslnikow a zahrodkarjow poskićeše tam regionalne wudźěłki. Tež wuběr kulinariskich chłóšćenkow a přisłušne recepty sej hosćo jara chwalachu.
Styki nachwilnje zastajili
Budyšin. Towarstwo Witaj do Budyšina je kóždežkuli zhromadne dźěło a wuměnu informacijow zwonka běžnych projektow z Budyskim krajnoradnym zarjadom nachwilnje zastajiło. Dołhož zastupowacy krajny rada Udo Wićaz swoje zastojnstwo dale wukonja a za zarjad dźěła, wostawa jenož tale móžnosć. „Wočakujemy a žadamy sej wotstup Uda Wićaza!“, rěka w nowinskej zdźělence towarstwa.
Lěsny woheń hašeć dyrbjeli
Policija (21.08.17)
Wnučkowy trik zwrěšćił
Kamjenc. Bjez wuspěcha wosta minjeny pjatk popołdnju trójny pospyt, staršim ludźom z pomocu tak mjenowaneho wnučkoweho trika pjenjezy wulišćić. Njeznata wobšudnica so telefonisce pola třoch žonow w starobje 80 do 83 lět přizjewi, wudawajo so jako wnučka resp. prawnučka. Wot rentnarkow žadaše sej wona sumy mjez 3 000 a 12 000 eurami za wumysleny nuzny pad. Žana z třoch zazwonjenych pak njeda so zjebać.
