Park ze studnjemi zaso w zwučenej pyše
Njeswačidło (JK/SN). Podobnje kaž w mnohich druhich gmejnach Budyskeho wokrjesa maja tež w Njeswačidle z jara wobmjezowanym budgetom hospodarić. Přiwšěm je z dobrym nazhonjenjom minjenych lět a z podpěru zamołwitych gmejnskich radźićelow móžno było, zjawne nadawki gmejny kaž tež tójšto na dobro wobydlerjow zwoprawdźić.
Hrodowy park a tamniše studnje běchu wulkeje wody lěta 2013 dla chětro poćerpjeli. Dźakowano spěchowanskim srědkam a twarskim firmam z bjezposrědnjeje wokoliny su park a studnje nětko zaso w tajkim stawje kaž do wulkeje wody. Studnje su ponowjene, figury wurjedźene a restawrowane. Tež technika za wodu a swěcu zaso funguje. Za to składowachu mnozy darniwi dobroćeljo šwarny fenk. Dobre 20 000 eurow su za ponowjenje studnjow nazběrali.
„Jednanja z NDP žane byli njejsu“
„Ně, Udo Wićaz njeje žane dowěrliwe informacije dale dał.“ Tak rěka wotmołwa z nowinarskeho wotrjada Budyskeho krajnoradneho zarjada na wotpowědne naprašowanje Serbskich Nowin.
Budyšin (SN/at). Tele wuprajenje wobkruća tež aktualna nowinska zdźělenka krajnoradneho zarjada. Nastupajo swoju rozmołwu z wokrjesnym předsydu NPD Markom Wruckom prěni přirjadnik krajneho rady Udo Wićaz (CDU) wuzběhnje, zo „njejsu z NPD žane jednanja byli. Su-li zwuraznjenja wokrjesneho předsydy NPD w socialnych syćach hinaši zaćišć zbudźili, je tón prosće wopačny a njewotbłyšćuje charakter rozmołwy. Jako přirjadnik njeje Wićaz w žanej formje ... jednał a njeje tež žane dowěrliwe informacije dale dał“, ze zdźělenki wuchadźa.
Nutřkowna žadosć
Rěčitaj z młodostnymi na dróze wo problemach
Budyšin (CS/SN). Srjedź měrca započeštaj Sofija Delanec a Benno Auras jako streetworkeraj na dróhach Budyšina dźěłać. Minjeny tydźeń staj wonaj w swojim domicilu w załožbowym domje na Wonkownej Lawskej w Budyšinje prěnju zjawnu bilancu skutkowanja sćahnyłoj. A ta bě přewažnje pozitiwna.
Krótkopowěsće (15.08.17)
W kruhu finalistow
Njebjelčicy. Gmejna Njebjelčicy wobdźěla so na cyłoněmskim wubědźowanju „Wjes ze žrom“ (Kerniges Dorf). 147 wsow a gmejnow je so wo myto prócowało. A w kruhu 22 finalistow su tež Njebjelčicy. Přichodny tydźeń chce so tam wubědźowanje wuhotowaca Agrarnosocialna towaršnosć wo konceptach a idejach za přichod wobhonić.
Jubilejny swjedźeń
Lědy. Ze sympozijom a swjedźenjom chce kónc tydźenja Muzej pod hołym njebjom na Lědach na 60lětne wobstaće zhladować. Za to přihotuja tež wosebitu wustajeńcu wo šěsć lětdźesatkach skutkowanja wot přeměstnjenja historiskich statokow hač k zarjadowanjam muzeja. Zajim zbudźić ma zdobom openair-galerija jako naddimensionalny album.
Zetkanje dudlowarjow
Praha. W čěskej stolicy je so minjeny tydźeń akcija „Dudlawa je žiwa!“ wotměła. Na njej zetkachu so dudlowarjo z wjacorych krajow Europy, mjez druhim tež z Němskeje. Zaměr bě, mjeztym rědki mechaniski hudźbny nastroj přez koncerty pod hołym njebjom a w Čěskim muzeju hudźby wuraznišo prezentować. Tež přihladowarjo móžachu so wuspytać.
Policija (15.08.17)
Płujadło přizemić dyrbjało
Zdźar. Na kukuricnišću pola Zdźarja (Särchen) we Wulkodubrawskej gmejnje dyrbješe zawčerawšim popołdnju płujadło nuzowje přizemić. Wone bě do toho na bliskim Klukšanskim lětanišću startowało. Kaž sobudźěłaćer zwjazkoweho zarjada za lětadłowe njezboža pozdźišo zwěsći, bě 53lětny pilot po wšěm zdaću nadobo termiku zhubił a njemóžeše so tak hižo dlěje w powětře dźeržeć. Při nuzowym přizemjenju so wón snadnje zrani. Wuchowanske jězdźidło dowjeze jeho do chorownje.
Wjesnu zhromadnosć skrućili
Róžant (JK/SN). Hdyž maja druhdźe na wjesnych swjedźenjach pisane programy a wulke zarjadowanja, spokojeja so Róžeńčenjo z něšto mjeńšimi atrakcijemi. Wažne je, zo maja něšto ze zhromadneho swjećenja. A tomu na lětušim bjezdwěla tak bě. Hižo pjatkowne zahajenje wopokaza so jako jara spomóžne, byrnjež wopytowarjo zdźěla hakle w połnocy přišli.
Sobota steješe w znamjenju sporta. Na beachvolleyballowym turněrje, kotryž bě za mustwa wokolnych wsow předwidźany, wobdźělichu so tež sportowcy z Kamjenca. Jako dobyćerja móžeše sobuorganizator Jurij Bjeńš počesćić mustwo „Volker Rachow“ z Worklec. Paralelnje k tomu kopachu bul na dartowu sćěnu. Najwuspěšniši bě tu na kóncu Kamjenčan. Wječor so něšto mjenje hosći do Róžanta na „čorny lód“ namaka. Přiwšěm běchu organizatorojo wokoło Bena Šołty, Jurja Bjeńša a Markusa Kobalca z wothłosom spokojom.
Jubilej ma město zwjazać
Wojerecy (AK/SN). Hódnje a mnohostronsce chce město Wojerecy klětu 750. róčnicu prěnjeho naspomnjenja swjećić. „Chcemy wobydlerjow runje tak zapřijeć kaž towarstwa, organizacije a předewzaća“, podšmórny minjeny pjatk socialny měšćanosta Thomas Delling, kiž nawjeduje dźěłowu skupinu „750 lět Wojerecy“. Jubilej złožuje so na 1. meju 1268. Tehdy podpisa markhrabja Otto von Brandenburg dźělenje Hornjeje Łužicy do Budyskeho a Zhorjelskeho kraja. Woběmaj přidźěli wón dźěl Wojerowskeho knjejstwa.
Za jubilej planuja 200 000 eurow. W septembru 2018 chcedźa swjedźenski tydźeń wotměć, rozłoži Thomas Delling. „Wažne při tym je stare a nowe město zwjazać.“ Wón móhł sej symbolisku časowu pruhu předstajić, kotraž saha wot stareho torhošća nimo hrodu hač k Łužiskemu naměstu. Na tejle pruze móhli najwažniše mězniki stawiznow na markantnych dypkach zwobraznić. Kónc oktobra chce Delling hruby koncept jubileja předstajić. We Wojerecach swjeća klětu nimo toho 120lětne wobstaće chorownje, 70lětne wobstaće ludoweje uniwersity, wotewrjenje kupnicy Centrum před 50 lětami a 650lětne wobstaće Kinajchta.
Zhromadnje za rozrisanjom pytać
Wotstup zastupowaceho Budyskeho krajneho rady Uda Wićaza (CDU) žadataj sej zapósłanča zwjazkoweho sejma Caren Lay (Lěwica) a Budyski wokrjesny předsyda Zwjazka 90/Zelenych Jens Bitzka. Dr. Uta Strewe (SPD) Uda Wićaza tohorunja kritizuje, wabi pak za kulojte blido, zo bychu demokratiske mocy problem rozrisali.
Budyšin (SN/at). Wuchadźišćo su podawki nastupajo młodeho Libyčana na Budyskich Žitnych wikach. Zo je so prěni přirjadnik krajneho rady Udo Wićaz w tym zwisku z mužom NPD Markom Wruckom zetkał, Caren Lay a Jens Bitzka porokujetaj. „Wićazowe zadźerženje městu Budyšinej a demokratiji jara škodźi. Jeho wotstup je njewobeńdźomny“, Bitzka pjatk zwurazni. Nawjazujo na lońše zetkanje krajneho rady Michaela Hariga (CDU) z Wruckom wón wotwodźuje, zo „njejsu z dotalneho zmylka po zdaću ničo wuknyli“. Budyski region ma problem z organizowanymi neonacijemi. „Dźe wo to, zo wšitke demokratiske strony namóc zhromadnje wotpokazaja, nimaja pak hidźerjam ruku podać.“
