W nowej tepjerni dosć městna za wiziju do přichoda
Budyšin (CS/SN). Po tym zo je so šěsćlětne dźěćo displayja wodźenskeje připrawy dótknyło, započa wčera nowa tepjernja Budyskeho energijoweho a wodoweho zawoda EWB oficialnje dźěłać.
Šuler 1. lětnika Serbskeje zakładneje šule Budyšin rěka Kasimir Böhmer a je syn měšćanosty Roberta Böhmera. Kaž jednaćel EWB Volker Bartko rjekny, je nowa tepjernja na Thomasa Müntzerowej inwesticija do přichoda. Z njej móža wot klětušeho lětnje 28 500 tonow wuhlikoweho dioksida zalutować. Hižo dźensa zastaruje zawod EWB 40 procentow Budyskich domjacnosćow z dalnoćopłotu. Přichodnje ma to hišće wjace być. Předewšěm w nutřkownym měsće su hišće komunalne twarjenja, kotrež móhli syći přizamknyć.
Krótkopowěsće (23.11.16)
Krabat jako app wuspytać
Budyšin. „Krabat a potajnstwo serbskeho krala, 1. staw“ předleži wotnětka jako pospytna wersija dyrdomdejskeje kompjuteroweje hry jako app za mobilne nastroje, kaž tablet abo smartphone. Projektna skupina „Rapaki“ je ju w nadawku Załožby za serbski lud wuwiła. Putaca stawizna jedna 1714. Kompletna werzija ma klětu dozhotowjena być.
Šulerskej filmaj dobyłoj
Wojerecy. Hnydom dwójce su Wojerowsku kulturnu fabriku na Festiwalu sakskeho šulerskeho filma wuznamjenili. Prěnje myto dobychu šulerjo 4. lětnika dźěćaceho domu „Při Halštrowskim wobłuku “z projektom „Pućowacy złotak“. 10. lětnik Lessingoweho gymnazija dósta za swój film „Město“, kotryž je zhromadnje z kulturnej fabriku zhotowił, druhe myto.
Nowy předsyda towarstwa
Budyšin. Budyšan Andreas von Geibler je nowy předsyda towarstwa Willkommen in Bautzen. Čłonojo předsydstwa su jeho wuzwolili, po tym zo bě prěni a dotalny předsyda loni załoženeho towarstwa Sven Scheidemantel hižo w oktobrje zastojnstwo złožił. Zdobom je wón tež z towarstwa wustupił.
BVB wosom króć trjechił
Policija (23.11.16)
W zahrodowych domčkach kradnyli
Budyšin. Do 15 zahrodowych domčkow při Budyskej Müntzerowej su so njeznaći w nocy na minjenu póndźelu zadobyli. Pokradnychu z nich wšelake elektriske nastroje, alkoholiske napoje kaž tež wozyčk. Nimo toho skóncowachu z motorskej piłu třěchu bungalowa a rozbichu studnjowu rynku. Hódnota pokradnjenych wěcow wučinja 500 eurow, wěcna škoda pak wjace hač 4 000 eurow.
Što je so woprawdźe stało?
Hamtske sudnistwo jedna spjećowanja přećiwo policistam dla
Budyšin (UM/SN). Wšelakich deliktow dla dyrbja so wot wčerawšeho třo młodźi mužojo před Budyskim hamtskim sudnistwom zamołwić. Dwěmaj 21lětnymaj mjez druhim wumjetuja, zo staj při wohenju w bywšim Budyskim hotelu „Husarenhof“ 21. februara dźěło wohnjowych wobornikow poćežowałoj a so přećiwo policajskim zastojnikam spjećowałoj.
Poprawom Michael H. scyła ničo rjec nochcyše. Po tym pak, zo bě wuprajenja swojeho sobuwobskorženeho Philippa G. słyšał, wón swój rozsud změni. „Wšitko bě cyle hinak“ je rezimej jeho wuprajenja – hinak, hač to, štož běchu policisća protokolowali; hinak wězo tež hač to, štož běchu medije wo zahubnej nocy rozprawjeli. Wšako njebě to žadyn „jednory“ woheń. Dokelž mějachu do bywšeho hotela ćěkancy zaćahnyć, su tehdyše podawki wulku kedźbnosć zbudźili, tež daloko za mjezami Němskeje.
Wjace hač 20 młodostnych ze Sulšec pola Kulowa je minjenu sobotu ...
Z młodej mocu na dobro gmejny
Gmejnska rada gmejny Ralbicy-Róžant ma nowu čłonku. Na minjenym posedźenju radźićelow zawjaza zastupowacy wjesnjanosta Tomaš Bjeńš młodu Serbowku Janu Bjeńšowu ze Sernjan. Wona budźe w gmejnskej radźe sylnić rjady Swobodneho wolerskeho zjednoćenstwa Delany. Jeje wulki plus je, zo swoju gmejnu derje znaje, wšako je tu wotrostła a tak bjezposrědnje wuwiće wsow wokoło Róžanta wědomje dožiwiła.
Wutwar interneta wažny za přichod
Brězowka (AK/SN). Wutwar šěrokopasmoweje techniki měł dale zaměr gmejny Dźěwin (Groß Düben) być. „Hdyž jón woprawdźe chcemy a za tym stejimy, móžemy to docpěć. Hdyž njewojujemy, smy hižo přěhrali“, apelowaše rěčnica šěrokopasmoweje iniciatiwy w Slepjanskim zarjadniskim zjednoćenstwje Kerstin Schuster na zašłym posedźenju Dźěwinskeje gmejnskeje rady.
W komunje maja wulki problem, swójski podźěl zwjesć. Po wuprajenju komunalneho dohladowanskeho zarjada Zhorjelskeho wokrjesa njesmědźa za tónle zaměr žadyn kredit brać. Tohodla dyrbja hospodarski zawěsćenski koncept zdźěłać. Kaž komornica Carmen Petrick rjekny, maja so z tajkim konceptom wšitke dobrowólne wudawki přepruwować. Skrótša-li přiražku za priwatnych twarskich knjezow, móhła gmejna na přikład 7 500 eurow zalutować. Ale tež wustawki wo pohrjebnišću, wo psyčim dawku a wo spěchowanju towarstwow maja so přepruwować.
Krótkopowěsće (22.11.16)
Ptača gripa so rozpřestrěwa
Drježdźany. Ptača gripa so dale rozpřestrěwa a je mjeztym saksku krajnu stolicu docpěła. Pola dźiwjeje kački, kotruž běchu mortwu při jězoru w Birkwitzu-Pratzschwitzu pola Drježdźan našli, zwěsćichu strašny wirus H5N8, kaž zamołwići z Drježdźan zdźěleja. Mjeztym zarjadowanje wěstotne pasmo nětko je tež psam a kóčkam zakazane.
Wuradźuja wo digitalizaciji
Lipsk. Drobna hospodarska struktura we wuchodnej Němskej je jedyn z hłownych zadźěwkow při dalewuwiću digitalizacije. Najwjetši dźěl swójbnych předewzaćow je z politiskich přičin w prěnjej generaciji a ma mjenje hač 20 přistajenych, zdźěli prezident Zwjazka swójbnych předewzaćelow. W Lipsku wuradźuje dźensa 250 wobdźělnikow wo nowych wuwićach w swójbnych firmach.
Hanjenje prezidenta pochłostać?
Policija (22.11.16)
Wodźerce awta žiwjenje wuchowali
Tyhelk. Prěni pomocnicy su wčera rano znjezboženej žonje po wšěm zdaću žiwjenje wuchowali. Wobchadne njezbožo sta so na wokrjesnej dróze mjez Tyhelkom a Bórkom blisko Wojerec. 32lětna wodźerka VWja bě tam z dotal njeznateje přičiny w lěwej křiwicy na prawy bok jězdnje zajěła a z awtom zwróćiła. Při tym započa so jězdźidło palić. Prěnim pomocnikam so poradźi, žonu z awta wućahnyć a płomjenja podusyć. Wuchowanska słužba dowjeze snadnje zranjenu do chorownje. Nastata wěcna škoda na VWju wučinja něhdźe 8 000 eurow.
Dźěćom w Němcach z knihi čitała
Z Budyšina do Němcow je minjeny pjatk přijěła bywša pěstowarka Jadwiga Wejšina. W našej Witaj-pěstowarni „Pumpot“, kotraž je w nošerstwje Serbskeho šulskeho towarstwa, dźěći wulkeje skupiny hosća njesćerpnje wočakowachu. Hižo do toho běchmy so wo předčitanskim dnju rozmołwjeli a so nadźijeli, zo nas z wowkow, dźědow abo přiwuznistwa něchtó wopyta. Tak bě wjeselo wulke, jako knjeni Wejšina z knihu w ruce do jstwy zastupi. Dźěći so z wulkim wočakowanjom w kruhu na stólcy zesydachu.
Kniha Jěwy-Marje Čornakec „Kak je wroblik Frido lětać nawuknył“ bě jim nowosć. Jara wutrajnje wone čitanje sćěhowachu a sćerpliwje słuchachu. W rozmołwje so tón abo tamny słowa jimaše, z čehož bě wusłyšeć, zo su holcy a hólcy wšitko zrozumili.
Zo je nas Jadwiga Wejšina na tymle dnju z rjanej serbskej knihu překwapiła, nas wosebje zwjesela. Přichodne dny chcemy dźěćom dale z knihi předčitać a sej z nimi wobrazy wobhladać.
Gabriela Hórnikowa
