Rjane swjedźenje w Nižej Wsy
To so jeno dźiwaš
Krótkopowěsće (27.07.16)
Nowe delnjoserbske Spěwarske
Berlin/Choćebuz. „Tyca“ (tučel) je titul nowych Spěwanskich w delnjoserbskej rěči, zdźěli wčera Ewangelska cyrkej Berlin-Braniborska-šleska Hornja Łužica. Spěwnik, na kotrymž su pjeć lět dźěłali, wopřija 75 načasnych kěrlušow. Wuzwolili su je tež młodostni a wučerka nabožiny Choćebuskeho Delnjoserbskeho gymnazija.
Budu ranjenych lěkować
Praha. Čěske zakitowanske ministerstwo zdźěli, zo chce kóždolětnje 30 ćežko zranjenych z wukraja lěkować. Při tym mysla na ukrainskich wojakow, ranjenych we wojowanjach z proruskimi rebelemi, abo na Kurdow, potrjechenych w bojach z teroristiskej milicu Islamski stat. Kóšty transporta a lěkowanja jednoho ranjeneho wobličeja ze 40 000 eurami.
Mjenje motorskich znjezbožiło
Policija (27.07.16)
Muž so při dźěle wopalił
Wětrow. We Wětrowje je so dźěłaćer wčera dopołdnja při wukonjenju asfaltowych dźěłow zranił. Walca, kotruž 62lětny wodźeše, so na nahłym městnje powróći, na čož muž do horceho bitumena padny. Wožahanja dla jeho do chorownje dowjezechu. Lěkar bě z helikopterom k městnu njezboža přilećał.
Kremserowy wóz pomórali
Kulowc. Dotal njeznaći su po zdaću wčera w nocy kremserowy wóz a murju ležownosće w Kulowcu pomórali. Při tym wužiwachu grafitijowu prsykawu. Wěcna škoda wučinja něhdźe 500 eurow. Kriminalna policija za skućićelemi slědźi. Pomóranje pak skerje wobsedźer kremsera a domskeho wotstroni.
Alternatiwa za šulerjow
Budyšin (SN). Ze zakónčenjom lětnich prózdnin 8. awgusta zahaji so za šulerjow a wukubłacych nowe šulske lěto. Za šulskich nowačkow, sobujědujcych w busu, železnicy abo tramwajce, to woznamjenja, zo podadźa so po njeznatych pućach k šuli. Tomu so tež wobchadne předewzaća kaž wobchadny zwjazk Hornje Łobjo (VVO) přiměrja a poskićeja staršim za tuńšu alternatiwu płaćizny jězdźenkow. Wužiwajo potuńšene tydźenske, měsačne a lětne lisćiki, trjebaja woni potom kartu kupcow. Tajku dóstanu bjezpłatnje pola VVO a dalšich wobchadnych předewzaćow.
Kładu nowe špundowanje
Biskopicy (SN). Wot dźensnišeho hač do pjatka kładu rjemjeslnicy w ambulancy za nuzne pady Biskopičanskeje chorownje nowe špundowanje. Z tym su wězo wobmjezowanja zwjazane. To rěka, zo měli so zranjeni w chirurgiskej praksy dr. Lehmann a dr. Viehriga w Biskopicach přizjewić. Zdobom měli so pacienća z chutnymi symptomami tež do Kamjenskeje chorownje maltezow, do Budyskeho kaž tež Wojerowskeho klinikuma podać abo nuzoweho abo domjaceho lěkarja zazwonić.
Wjace njezbožow
Do něhdyšeje Njeswačanskeje šule bórze wuměnkarjo zaćahnu
W lěće 1653 natwarichu w Njeswačidle prěnju šulu. To bě hižo sto lět do zawjedźenja powšitkowneje šulskeje winowatosće w Hornjej Łužicy a sydom lět po natwarje tamnišeje fary. Dokelž běše kubłanišćo z drjewa a ze šindźelom kryta, třěcha po někotrych lětdźesatkach žadanjam hižo njewotpowědowaše. Tak natwarichu 1732 njeposrědnje při cyrkwi nowe, masiwne šulske kubłanišćo. Přiběraceje ličby šulerjow bě 1805 trjeba ju powjetšić. 1875 chodźeše w Njeswačidle 174 dźěći do šule. Mějachu tam wučerjow za holcy a wučerjow za hólcow. 1886 nasta cyle nowa šula, kotruž 1910 rozšěrichu. 1931 přińdźe serbski antifašistiski wojowar w rjadach KPD Pawoł Njek jako wučer do Njeswačidła. 1932 přesadźichu jeho do šule w Rudnych horinach, 1933 pušćichu jeho ze šulskeje słužby.
Kofej, tykanc a wšelake družiny lodu poskića Rakečanski pjekar ...
Internet wšudźe přistupny
We Wojerecach, Wulkej Dubrawje a Kamjencu lědma prózdne bydlenja
Budyšin (SN/mwe). W Budyskim wokrjesu su mnohe bydlenske drustwa Sakskemu zwjazkej bydlenskich drustwow (VSWG) přirjadowane. Naprašowanja za zapłaćomnymi bydlenjemi w Rakecach abo Zemicach-Tumicach runje tak přiběraja kaž w Kamjencu, Budyšinje a we Wojerecach. Tež komunalne bydlenja su prašane, přiběrajcy za jednu wosobu.
Na kóncu kóždy z rybu domoj šoł
To bě hižo štwórty dźěćacy a młodźinski camp, kotryž su zawčerawšim, njedźelu, při Kulowskim cyhelowym haće zakónčili. Sydomnaće holcow a hólcow móžeše so tam tři dny wudźenju wěnować.
Kulow (HH/SN). Samo nócne wudźenje z wobswětlenjom, grilowanski wječor ze wšěmi móžnymi wudźenskimi pryzlemi, zhromadny přihot a warjenje gulaša w kotole, wudźenska teorija jako dalekubłanje, małe płuwanske wubědźowanja a wudźenje bjez kónca. To bě lětuši dźěćacy a młodźinski camp wot 22. do 24. julija pod nawodom Kulowskeho wudźenskeho towarstwa hromadźe z Wojerowskim towarstwom „Hechtgeschwader“. Wot Ronnyja Mrosacka a Stephana Paula – wonaj staj w Kulowje a Wojerecach za młodych wudźerjow zamołwitaj – je zhonić, zo měješe lěhwo hnydom wjacore zaměry. „Zwjazujemy tak teoriju z praksu. Lěpšina při tym je, zo móža wobdźělnicy to nawuknjene hnydom nałožować. Nimo toho móžachu so hišće raz za tym a tamnym woprašeć, štož zrozumili njejsu“, Ronny Mrosack rozkładuje. „Na třoch dnjach je so towarstwo skrućiło. A přiběrała je česćownosć před přirodu, w kotrejž so pohibujemy“, Stephan Paul dodawa.
