Krótkopowěsće (17.08.23)
„Ćežke šulske lěto“ w Sakskej
Drježdźany. K nowemu šulskemu lětu su 1 120 nowych wučerjow za sakske šule přistajili. Wo tym informowaše dźensa w sakskej statnej kencliji kultusowy minister Christian Piwarz (CDU). „Bychmy sej hišće wjac přeli, ale pobrachowacych požadanjow dla to nažel móžno njebě“, praješe minister. Tohodla „stejimy znowa před ćežkim šulskim lětom, zaručenje wučby wostanje wulke wužadanje.“
Baselitz zaso w Albertinumje
Drježdźany. Po wosom lětach wróći so Georg Baselitz do Drježdźanskeho Albertinuma. W rumnosći, předwidźanej za njeho, budu jeho twórby zaso widźeć, rjekny direktorka Hilke Wagner powěsćerni dpa. Muzej pokazuje swój wobstatk z Němskich Pazlic pochadźaceho wuměłca składnostnje jeho 85. narodnin, kiž běchu 23. januara. Dźěła su „ze wšěch periodow tworjenja“.
Hribam dale woda pobrachuje
Hriby zamóža čłowjeka wohrožeć
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk znatym a mjenje znatym chorosćam, zo by je čitarjam trochu bliže rozłožował (25).
Za medicinu su předewšěm tři formy mikroorganizmow relewantne: bakterije, wiry a hriby. Hriby su při tym zwjetša dermatologiski problem, zamóža pak tež žiwjenje wohrožace zjawy zawinować. Zarjadujemy humanpatogene, potajkim čłowjekej škodźace hriby do třoch skupin. Prěnju tworja dermatofyty, nitkate hriby. Wone so přewažnje na koži čłowjeka rozmnožeja. Hriby so wosebje tam derje čuja, hdźež je ćopłe a włóžne, na přikład pod włosami. Zasadnje pak zamóže so tajki hrib wšudźe zahnězdźić, pola chorych kaž strowych. Wutupjenje njeje zwjetša problem. Hdyž je lěkar zwěsćił, zo jedna so při rozmnožacym so čerwjenjenju wo hrib, wotpowědna žałba spěšnje pomha. Komplikowaniše drje su hriby na nohomaj a při nochćach, dokelž zaso wotbyć cyle tak jednore njeje. Dobra hygiena tu rozsudźa.
Serbski podźěl so nawróćił
Skupina Kula Bula na Grodkowskim měšćanskim swjedźenju wustupiła
Grodk (JoS/SN). Za serbskej kulturu su wopytowarjo Grodkowskeho domizniskeho swjedźenja w minjenych lětach podarmo pytali. Po tym zo je so Grodkowski serbski kwasny ćah rozpušćił, su organizatorojo swjedźenja tónle wobłuk kulturnych programow bohužel z wočow zhubili.
Za minjeny kónc tydźenja je Michael Apel, jednaćel Grodkowskeje kinoweje a kulturneje tzwr (SKK) wotežki do rukow wzał a skupinu Kula Bula přeprosył. Apel je z powołanja rejwar. Jeho hesło je, zo njeměli wopytowarjo jenož přihladować a připosłuchać, ale tež aktiwnje sobu rejwać, předewšěm tradicionalne reje, kajkež su so něhdy na wsach a w městach rejwali. Po tutej zasadźe wón hižo wjacore lěta w Delnjej a Hornjej Łužicy rejwanske zarjadowanja organizuje. Wopytowarjo přisłušeja drje zwjetša staršim semestram, ale tež młódši zajimcy druhdy přichadźeja, tak kaž bě to tež kónc tydźenja w Grodku.
Spěwaja na horje
Wuježk. Chór Budyšin zanjese njedźelu, 20. awgusta, w 14.30 hodź. při hosćencu na Čornoboze na swojim mjeztym tradicionalnym lětnim koncerće zaso serbske, němske a mjezynarodne spěwy. Zastup je darmotny, chór pak prosy wo obolus za podpěru swojeje dźěławosće. Wšitcy su wutrobnje přeprošeni.
Hudźa w hosćencu
Budyšin. Budyski hosćenc „Sprjewina pensija“ wuhotuje pjatk, 18. awgusta, wot 19 hodź. piwarniski a lětni swjedźeń. Na nim zahudźi kapała „Jolly Jumper“. Zastupne lisćiki předawaja jeničce při wječornej kasy. Rezerwowanja móžne njejsu.
Z lětadłami figury molowali
Budyšin (CS/SN). Hartwig Martens z Celle bě minjeny kónc tydźenja jedyn z pilotow, kotřiž wobdźělichu so na lětarskich dnjach w Lětonju pola Budyšina. Runje tak kaž w mnohich zašłych lětach je wón lětsa znowa swoje lětarske kmanosće demonstrował a tež wopytowarjow w swojej Stearman sobu lećeć dał. Jemu lubjachu so přijomna atmosfera a rozmołwy ze zajimowanymi ludźimi.
Wot pjatka hač do njedźele přichadźachu tysacy wopytowarjow na areal lětanišća, tež hdyž dyrbjachu so za to při zastupje nastupić. Woni njemóžachu jenož w lětadłach sobu lećeć, ale na přikład tež we wojerskich awtach sobu jěć. Dale wotměchu so wulke čaporowe wiki z něhdźe 150 wikowarjemi. Wobdźiwać hodźachu so oldtimerowe jězdźidła a tež modele. Najpřićahliwiše pak běchu demonstracije pilotow, kotrež z lětadłami zajimawe figury na njebju molowachu.
Policija (16.08.23)
Psa jednu nóc zastarali
Tjebin. Njewšědneho hosća mějachu w nocy na wutoru na Běłowodźanskim policajskim rewěrje. Wobydlerjej w Trjebinje bě póndźelu wječor cuzy psyk přiběžał. Dokelž štyrinohač žadyn chip njeměješe a tež žane hinaše pokiwy k jeho wobsedźerjej spóznać njeběchu, dowjeze muž psa k policiji. Zastojnicy so jednu nóc wo njeho starachu. Wutoru rano so potom wobsedźer pola policije přizjewi. Policisća dowjezechu Eddyja, kaž psyk rěkaše, domoj a jeho wolóženemu wobsedźerjej přepodachu.
Na wčerawšim patronatnym swjedźenju Marije donjebjeswzaća je so ...
Wjeselo na drasće dale dawać (6)
Cyłkownje 18 towarstwow je so w zwisku z wubědźowanjom Leaderoweje kónčiny Hornjołužiska hola a haty „Podpěra regionalne dźěła“ wuznamjeniło. W swojej lětnjej seriji wěnuje so wječornik dobyćerjam a chce towarstwa a jich zaměry předstajić.
Hordźe rejuja holcy bantowu reju wokoło meje. Při tym su holcy ze Spal serbsku ewangelsku drastu wokoło Wojerec zhotowane. Rejowanje je zbliža. Kóždy druhi tydźeń zetkawaja so starodawni wobydlerjo wsy wot lońšeho z dźěćimi a z nimi zhromadnje reje zwučuja. „Projekt přewjedujemy w domizniskim towarstwje tu w Spalach. Wone zaběra so z dźěłom z dźěćimi a młodźinu a prócuje so wo to, serbsku drastu zdźeržeć“, praji Anja Winzer z domizniskeho towarstwa. „Mamy mnohich pomocnikow. K nim słušatej tež Carola Holdt a Anja Metzner, kotrejž z dźěćimi na rejach dźěłatej.“ Druhe městno je towarstwo ze swojim dźěłom w Leader-projekće dobyło a smě so nětko nad 3000 eurami wjeselić.
Krótkopowěsće (16.08.23)
Sakske komuny w nuzy
Drježdźany. Financne połoženje komunow w Sakskej je problematiske – to wuchadźa z wotmołwy nutřkowneho ministra Armina Schustera (CDU) na naprašowanje zapósłanca Mirka Schultze (Lěwica), kotraž SN předleži. Tak běchu Lipsk a wokrjesaj Budyšin a Zhorjelc kónc junija hišće bjez přizwoleneho aktualneho etata. Budyski wokrjes je mjeztym wuwzaćne zrjadowanje docpěł.
Zeleni žadaja sej wotmołwu
Wojerecy. Zapósłanča Sakskeho krajneho sejma Petra Čagalj Sejdi (Zwjazk 90/Zeleni) žada sej „wujasnjenje sakskeho ministerstwa nutřkowneho nastupajo wotsunjenje Pakistanjana direktnje z Wojerowskeho strowotniskeho zarjada“. Ministerstwo njeje pječa ničo wo terminje wědźało, kotryž policija za wotsunjenje wužiwaše. Zeleni chcedźa přikazy policiji k wotsunjenju zasadnje ponowić.
Wjace zawodnych insolwencow
Policija (15.08.23)
Při jězoru koleso pokradnyli
Wojerecy. Hižo zaso je so při kupanskim jězoru padustwo stało. Po tym zo je so sobotu při Berzdorfskim jězoru pola Zhorjelca awto zhubiło, su njeznaći njedźelu při Šibojskim jězoru elektrokoleso pokradnyli. Wobsedźer bě je blisko kupanskeho pobrjoha wotstajił. Paduši składnosć wužichu a z kolesom wotjědźechu. Škodu trochuje policija na nimale 700 eurow.
